Jabin Ko Dar Pe Jhukana Hi Bandagi to Nahin

Krishn Bihari Noor

jabin ko dar pe jhukana hi bandagi to nahin

ye dekh meri mohabbat men kuchh kami to nahin

hazar gham sahi dil men magar ḳhushi ye hai

hamare honTon pe mangi hui hansi to nahin

miTe ye shub.h to a dost tujh se baat karen

hamari pahli mulaqat aḳhiri to nahin

hui jo jashn-e-baharan ke naam se mansub

ye ashiyanon ke jalne ki raushni to nahin

hayat hi ke liye be-qarar hai duniya

tire firaq ka maqsad hayat hi to nahin

gham-e-habib kahan aur kahan gham-e-janan

musahibat hai yaqinan barabari to nahin

ye hijr-e-yar ye pabandiyan ibadat ki

kisi ḳhata ki saza hai ye zindagi to nahin

tumhari bazm men afsana kahte Darta huun

ye sochta huun yahan koi ajnabi to nahin