duur ta-hadd-e-nazar ab-e-shajar kuchh bhi nahin
jaane kya kya tha nigahon men magar kuchh bhi nahin
jis ki takmil men ik umr hui apni tamam
vaqt aaya to vo saman-e-safar kuchh bhi nahin
duur tak phail ga.i zaḳhm chaTakne ki sada
vo bahut paas tha aur us ko ḳhabar kuchh bhi nahin
har nafas karb ke jangal men bhaTakne ke siva
agahi kuchh bhi nahin fikr-o-nazar kuchh bhi nahin
ab vo ik pal ki masarrat ho ki sadiyon ka alam
koi surat ho in ashkon se mafar kuchh bhi nahin
raat phir jal ke pighal ke to sahar tak pahunchen
phir ye dekhen sar-e-daman-e-sahar kuchh bhi nahin
Leave a Reply