tu na ho ham-nafas agar jiine ka lutf hi nahin
jis men na tu sharik ho maut hai zindagi nahin
ishrat-e-did hai yahi apna bhi kuchh rahe na hosh
jalva ba-qaid-e-tab-e-did asl men jalva hi nahin
avval-e-ishq hi men kya dil ka ma.aal dekhna
ye to hai ibtida-e-soz aag abhi lagi nahin
ishq hai kaif-e-be-ḳhudi is ko ḳhudi se kya gharaz
jis ki faza ho vasl o hijr ishq vo ishq hi nahin
ye bhi na ho ḳhabar ki sar sajde men hai jhuka hua
jis men ho bandagi ka hosh vo koi bandagi nahin
kis ka sar-e-niyaz tha pa-e-ayaz par jhuka
mana-e-bandagi-e-shauq satvat-e-ḳhusravi nahin
kar na sukun-e-dil ka gham hadi-e-mubtala zara
ishq ki bargah men dard ki kuchh kami nahin
Leave a Reply