Sufi

Nae Sire Se Phir Aaj Kaifi Hum Apni Duniya Basa Rahe Hain

nae sire se phir aaj ‘kaifi’ ham apni duniya basa rahe hain

jo kho chuke us se be-khabar hain jo rah gaya vo luta rahe hain

nashat-e-imroz ki qasam hai ki dil ne sab mahfilen bhula diin

diye the maazi ne daagh jitne vo khud-ba-khud mitte ja rahe hain

khusha ye daur-e-shabab un ka ye dil-navaz iltifat un ka

ki be-piye aaj har qadam par mire qadam ladkhada rahe hain

udhar nazar hai idhar nazar hai kuchh apni rusvaiyon ka Dar hai

jhijak rahe hain thithak rahe hain magar miri samt aa rahe hain

haya ne go jurat-e-takallum zaban se chhin li hai lekin

vo ankhon ankhon hi men bahut kuchh suna chuke aur suna rahe hain

shabab hai aur shadmani bahar hai aur kamrani

bane hain sarshari-e-mujassam mujhe bhi vo khud bana rahe hain

More Poems

Leave a Comment