Altaf Mashhadi
nazakat mohabbat ka gham kha rahi hai
mohabbat mohabbat hui ja rahi hai
tumhari nazar ke hasin mai-kadon men
urus-e-ḳharabat iThla rahi hai
nazar kya laḌi ek ḳhandan nazar se
javani tabassum bani ja rahi hai
tasavvur ke hathon men de kar khilaune
javani mohabbat ko bahla rahi hai
ye kya baat hai ajnabi ankhḌiyon se
koi jani-bujhi sada aa rahi hai
na phulon ki rut hai na kaliyon ka mausam
magar bulbul-e-be-nava ga rahi hai
ye ‘altaf’ kaun aa gaya vaqt-e-aḳhir
qaza narm-o-shirin hui ja rahi hai
Leave a Reply