majnun ne shahr chhoda to sahra bhi chhod de
nazzare ki havas ho to laila bhi chhod de
vaaiz kamal-e-tark se milti hai yaan murad
duniya jo chhod di hai to uqba bhi chhod de
taqlid ki ravish se to behtar hai khud-kushi
rasta bhi dhund khizr ka sauda bhi chhod de
manind-e-khama teri zaban par hai harf-e-ghair
begana shai pe nazish-e-beja bhi chhod de
lutf-e-kalam kya jo na ho dil men dard-e-ishq
bismil nahin hai tu to tadapna bhi chhod de
shabnam ki tarah phulon pe ro aur chaman se chal
is baagh men qayam ka sauda bhi chhod de
hai ashiqi men rasm alag sab se baithna
but-khana bhi haram bhi kalisa bhi chhod de
sauda-gari nahin ye ibadat khuda ki hai
ai be-khabar jaza ki tamanna bhi chhod de
achchha hai dil ke saath rahe pasban-e-aql
lekin kabhi kabhi ise tanha bhi chhod de
jiina vo kya jo ho nafas-e-ghair par madar
shohrat ki zindagi ka bharosa bhi chhod de
shokhi si hai saval-e-mukarrar men ai kalim
shart-e-raza ye hai ki taqaza bhi chhod de
vaaiz subut laae jo mai ke javaz men
‘iqbal’ ko ye zid hai ki piina bhi chhod de