Sharmindagi-E-Dil Ko Chhupaoge Kahan Tak

Raziya Subhan

sharmindagi-e-dil ko chhupaoge kahan tak

aahon ki rasa.i hai zamin aur zaman tak

bin us ke hai dushvar yahan saans bhi lena

aaya hai koi dil men utar kar rag-e-jan tak

kanon men vo amrit sa utar jaata hai ban kar

tasir masiha.i ki aa.e jo zaban tak

har dil men tamanna to har ik aankh men hasrat

shaida.i-e-ulfat hai yahan pir-o-javan tak

mahrum nazar hai mira zaḳhmon se bhara dil

hasil hai hamen daad faqat zor-e-bayan tak

gardan ye kisi taur kabhi bach na sakegi

aa ja.egi jis roz qaza nok-e-sinan tak

jis roz yaqin aa.ega mar ja.enge us din

rahne do mohabbat ko yunhi vahm-o-guman tak