akhir-e-kar chale tiir ki raftar qadam
ghair manzil na pade raah men zinhar qadam
uth gae vasl ki shab peshtar-az-yar qadam
aage ham umr-e-ravan se bhi chale chaar qadam
ku-e-maqsud se yuun rakhti hai ghaflat mujhe duur
jaise so jaane se ho jaate hain be-kar qadam
ahl-e-alam men huun main zindon men murdon ki tarah
badh chalen laakh magar saath hain do chaar qadam
ek muddat se rah-e-kaba men avara hain
kya khuda ka mujhe dikhlaenge didar qadam
josh-e-vahshat men bhi main chadh ke na us par dauda
le gae hasrat-e-khar-e-sar-e-divar qadam
surat-e-barg-e-khizan jhadte hain har gaam gunah
jab uthate hain tiri raah men zavvar qadam
ai junun koh-o-bayaban bhi dikhla mujh ko
rahen pasti o bulandi se khabar-dar qadam
kucha-gardi ye shab-o-roz ki be-vajh nahin
ediyan ragdenge kis ke pas-e-divar qadam
jada-e-rah-e-mohabbat ko khat-e-mustar jaan
sar ke bal misl-e-qadam chal jo hon be-kar qadam
khaak bhi huun to huun khak-e-dar us ka ‘atish’
jis ke the dosh-e-payambar ke saza-var qadam
Leave a Reply