kaun huun kyuun zinda huun sochta rahta huun
ḳhvabon ki duniya men jagta rahta huun
rang aur ḳhushbu se dhundla.e raston men
hava ki ungli thaam ke chalta rahta huun
avazon ki gaThri sar pe uTha.e hue
ḳhamoshi ke ziine chaḌhta rahta huun
jahan se mere jism ko ik din ugna hai
main us banjh zamin ko DhunDhta rahta huun
ankhon ki uryani se chhupne ke liye
na.e na.e malbus pahanta rahta huun
sub.h-o-sham hava ki andhi lahron men
zarra zarra ho ke bikharta rahta huun
soi hui rahon men tanha chand ke saath
saari saari raat bhaTakta rahta huun
lauh-e-jahan par banti bigaḌti tahriren
dekhta rahta huun aur sochta rahta huun
jism-o-jan ki dhuup se jalte sahra men
apna saaya oḌh ke chalta rahta huun
Leave a Reply