Tera Khayal Farozan Hai Dekhiye Kya Ho

tira khayal farozan hai dekhiye kya ho

khamosh gardish-e-dauran hai dekhiye kya ho

na jaane kitne sitare ye kahte Duub gae

sahar ka rang pareshan hai dekhiye kya ho

kali udaas chaman sogvar gul khamosh

ye intizar-e-baharan hai dekhiye kya ho

ajiib baat hai in tirgi ki rahon men

nafas nafas men charaghan hai dekhiye kya ho

bhadak raha hai abhi tak charagh akhir-e-shab

use bhi subh ka arman hai dekhiye kya ho

Leave a Comment