Poet
rahoge ham se kab tak be-ḳhabar se
juda hoti nahin divar dar se
musafir haal kya apna suna.e
abhi lauTa nahin apne safar se
hamesha to nahin rahta hai qaa.em
ta.alluq rah-rau ka rahguzar se
makanon se makin ruḳhsat hue hain
udasi jhankti hai bam-o-dar se
abhi tak huun safar men irtiqa ke
mujhe lagte the raste muḳhtasar se
isi miTTi se hai pahchan meri
mohabbat hai mujhe bhi apne ghar se
na jaane un pe kya guzri thi ‘shahid’
juda patte hue the jab shajar se
Leave a Reply