dil vahi dil jise nashad kiye jaata huun
yaani rah rah ke unhen yaad kiye jaata huun
sai-e-zabt-e-gham-e-bedad kiye jaata huun
pukhta-tar ishq ki buniyad kiye jaata huun
dil ko vaqf-e-gham-e-bedad kiye jaata huun
apna ghar aap hi barbad kiye jaata huun
ek vo hain ki taghaful se nahin un ko gurez
ek main huun ki unhen yaad kiye jaata huun
kya ye kam zulm hai kuchh ghaur to kiije dil men
aap hanste hain main fariyad kiye jaata huun
bhuul kar ahd-e-guzishta ki hikayat ‘shakil’
dil ko har fikr se azad kiye jaata huun
Leave a Reply