basa-auqat mayusi men ye aalam bhi hota hai
tabassum ki tahon men ehtimam-e-gham bhi hota hai
ḳhushi tanha nahin aati jilau men gham bhi hota hai
jahan hansti hain kaliyan girya-e-shabnam bhi hota hai
na.i tahzib ke me.amar shayad us se ghafil hain
ba-in asar-e-alam darham-o-barham bhi hota hai
jo ankhen ghunghaTon men roz ke faqon se pur-nam hain
un ankhon men fusun-e-ismat-e-mariyam bhi hota hai
ba-ima-e-ḳhirad tum dekhte ho jis ko nafrat se
vo divana ḳhirad ki asl ka mahram bhi hota hai
rabab-e-zindagi ke zamzamon par jhumne vaale
har ik naghme men na-malum sa matam bhi hota hai
vo insan naaz karta hai jo avval se sharafat par
bahakta hai to nang-e-azmat-e-adam bhi hota hai
javani sail-e-sher-o-bada-e-naghma sahi lekin
ye tufan-e-latafat ḳhud-baḳhud maddham bhi hota hai
jise koi samajh le sadgi se hasil-e-hasti
vo jab hasil nahin hota to aḳhir gham bhi hota hai
tabassum phuul barsata hai jin rangin honTon se
unhi honTon pe ik din nala-e-paiham bhi hota hai
ba-juz zat-e-ḳhuda ‘ehsan’ koi bhi nahin apna
suna tha laakh dushman hon to ik hamdam bhi hota hai
Leave a Reply