Azad Gulati
main apne aap se ik khel karne vaala huun
sabhi ye soch rahe hain ki marne vaala huun
kisi ki yaad ka mahtab Dubne ko hai
main phir se shab ki tahon men utarne vaala huun
sameT lo mujhe apni sada ke halqon men
main ḳhamushi ki hava se bikharne vaala huun
mujhe Dubone ka manzar hasin tha lekin
hasin-tar hai ye manzar ubharne vaala huun
hayat farz thi ya qarz kaTne vaali hai
main jism o jaan ki hadon se guzarne vaala huun
main saath le ke chalunga tumhen ai ham-safaro
main tum se aage huun lekin Thaharne vaala huun
sada-e-dasht sahi meri zindagi ‘azad’
ḳhala-e-dasht ko apne se bharne vaala huun
Leave a Reply