Jab Apne Etiqad Ke Mehwar Se Hat Gaya

jab apne e’tiqad ke mehvar se hat gaya

main reza reza ho ke harifon men bat gaya

dushman ke tan pe gaad diya main ne apna sar

maidan-e-kar-zar ka pansa palat gaya

thodi si aur zakhm ko gahrai mil gai

thoda sa aur dard ka ehsas ghat gaya

darpesh ab nahin tira gham kaise maan luun

kaisa tha vo pahad jo raste se hat gaya

apne qarib pa ke moattar si ahaten

main bar-ha sanakti hava se lipat gaya

jo bhi mila safar men kisi ped ke tale

aaseb ban ke mujh se vo saaya chimat gaya

lutte hue avaam ke ghar-bar dekh kar

ai shahryar tera kaleja na phat gaya

rakkhega khaak rabt vo is kaenat se

jo zarra apni zaat ke andar simat gaya

choron ka ehtisab na ab tak hua ‘qatil’

jo haath be-qusur tha vo haath kat gaya

Leave a Comment