Buniyaad Kuchh To Ho

Faiz Ahmad Faiz

ku-e-sitam ki khamushi abad kuchh to ho

kuchh to kaho sitam-kasho, fariyad kuchh to ho

bedad-gar se shikva-e-bedad kuchh to ho

bolo ki shor-e-hashr ki ijad kuchh to ho

marne chale to satvat-e-qatil ka khauf kya

itna to ho ki bandhne paae na dast o pa

maqtal men kuchh to rang jame jashn-e-raqs ka

rangin lahu se panja-e-sayyad kuchh to ho

khuun par gavah daman-e-jallad kuchh to ho

jab khun-baha talab karen buniyad kuchh to ho

gar tan nahin zaban sahi azad kuchh to ho

dushnam naala hao-hu fariyad kuchh to ho

chikhe hai dard ai dil-e-barbad kuchh to ho

bolo ki shor-e-hashr ki ijad kuchh to ho

bolo ki roz-e-adl ki buniyad kuchh to ho