jahan-e-ghuncha-e-dil ka faqat chaTakna tha
usi ki bu-e-pareshan vajud-e-duniya tha
ye kah ke kal koi be-iḳhtiyar rota tha
vo ik nigah sahi kyuun kisi ko dekha tha
tanaben kucha-e-qatil ki khinchti jaati thiin
shahid-e-tegh-e-ada men bhi zor kitna tha
bas ik jhalak nazar aa.i uḌe kalim ke hosh
bas ik nigah hui ḳhaak tur-e-sina tha
har ik ke haath faqat ghaflaten thiin hosh-numa
ki apne aap se begana-var jiina tha
yahi hua ki fareb-e-umid-o-yas miTe
vo pa ga.e tire hathon hamen jo paana tha
chaman men ghuncha-e-gul khilkhila ke murjha.e
yahi vo the jinhen hans hans ke jaan dena tha
nigah-e-mehr men jis ki hain sad payam-e-fana
usi ka alam-e-ijad-o-naz beja tha
jahan tu jalva-numa tha larazti thi duniya
tire jamal se kaisa jalal paida tha
hayat-o-marg ke kuchh raaz khul ga.e honge
fasana-e-shab-e-gham varna dosto kya tha
shab-e-adam ka fasana gudaz sham-e-hayat
siva.e kaif-e-fana mera majra kya tha
kuchh aisi baat na thi tera duur ho jaana
ye aur baat ki rah rah ke dard uThta tha
na puchh sud-o-ziyan karobar-e-ulfat ke
vagarna yuun to na paana tha kuchh na khota tha
lagavTen vo tire husn-e-be-niyaz ki aah
main teri bazm se jab na-umid uTTha tha
tujhe ham ai dil-e-dard-ashna kahan DhunDen
ham apne hosh men kab the koi jab uTTha tha
adam ka raaz sada-e-shikast saz-e-hayat
hijab-e-zist bhi kitna latif parda tha
ye iztirab-o-sukun bhi thi ik fareb-e-hayat
ki apne haal se begana-var jiina tha
kahan pe chuuk hui tere be-qararon se
zamana dusri karvaT badalne vaala tha
ye koi yaad hai ye bhi hai koi mahviyyat
tire ḳhayal men tujh ko bhi bhuul jaana tha
kahan ki choT ubhar aa.i husn-e-taban men
dam-e-nazara vo ruḳh dard sa chamakta tha
na puchh ramz-o-kinayat chashm-e-saqi ke
bas ek hashr-e-ḳhamosh anjuman men barpa tha
chaman chaman thi gul-e-dagh-e-ishq se hasti
usi ki nik.hat-e-barbad ka zamana tha
vo tha mira dil-e-ḳhun-gashta jis ke miTne se
bahar-e-bagha-e-jinan thi vajud-e-duniya tha
qasam hai bada-kasho chashm-e-mast-e-saqi ki
batao haath se kya jam-e-mai sambhalta tha
visal us se main chahun kahan ye dil mera
ye ro raha huun ki kyuun us ko main ne dekha tha
umiid yaas bani yaas phir umiid bani
us ik nazar men fareb-e-nigah kitna tha
ye soz-o-saz-e-nihan tha vo soz-o-saz-e-ayan
visal-o-hijr men bas farq tha to itna tha
shikast-e-saz-e-chaman thi bahar-e-lala-o-gul
ḳhizan machalti thi ghuncha jahan chaTakta tha
har ek saans hai tajdid-e-yad-e-ayyami
guzar gaya vo zamana jise guzarna tha
na koi va.ada na koi yaqin na koi umiid
magar hamen to tira intizar karna tha
kisi ke sabr ne be-sabr diya sab ko
‘firaq’ naza.a men karvaT koi badalta tha
Leave a Reply