dekhi jo zulf-e-yar tabiat sambhal gai
aai hui bala mire sar par se tal gai
puchha agar kisi ne mira aa ke hal-e-dil
be-ikhtiyar aah labon se nikal gai
uryan hararat-e-tap-e-furqat se main raha
har baar mere jism ki poshak jal gai
kaifiyat-e-bahar jo yaad aai zer-e-khak
dagh-e-junun se apni tabiat bahal gai
us ke dahan-e-tang ki tangi na puchhiye
ejaaz samjhe baat jo munh se nikal gai
furqat men ham-baghal jo hua ‘barq’ gor se
hasrat visal-e-yar ki dil se nikal gai