Fitrat-E-Dil Ki Mehrbani Hai

Poet

fitrat-e-dil ki mehrbani hai

main huun ya gham ki tarjumani hai

gham men bhi dil ko shadmani hai

un ki shafqat hai mehrbani hai

har ḳhushi jin pe main ne qurban ki

kyon unhen shauq-e-jan-sitani hai

jo bhi hai dastan-e-ahal-e-vafa

dard-o-alam ki kahani hai

ham kahan qabil-e-gham-e-dil the

ik sitamgar ki mehrbani hai

dil ka rona hai aur kuchh bhi nahin

haa.e kya chiiz ye javani hai

soz gham dard ranj hijr malal

dil pe kis kis ki mehrbani hai

kis qadar hai ajiib surat-e-hal

gham hai dil ko na shadmani hai

ḳhamushi men hai lutf-e-goya.i

ye bhi ik shan-e-be-zabani hai

ek mauhum si tamanna ki

dil ki duniya pe hukmarani hai

mujh se milte ho be-niyazana

ye bhi andaz-e-dil-sitani hai

daagh dil ka kahin na miT jaa.e

ye tumhari hi ik nishani hai

ai mohabbat ye kya kiya tu ne

bad-gumani hi bad-gumani hai

zindagi bhar fareb khaa.e hain

doston ki ye mehrbani hai

ham sar-e-rah luT ga.e yaksar

rahbaron ki ye mehrbani hai

ai ‘kanval’ intiha-e-shauq na puchh

rat-din shaghl-e-naghma-ḳhvani hai