Mubarik Siddiqi
ret pe naqsh banate hue thak jaate hain
ḳhvab ankhon men sajate hue thak jaate hain
yuun hi qabron men nahin so.e thake haare badan
log duniya se nibhate hue thak jaate hain
zindagi pyaas ka sahra hai jahan qaid hain ham
aur ham pyaas bujhate hue thak jaate hain
mehrban koi nahin shahr men ik tere siva
yuun to ham haath milate hue thak jaate hain
chhoḌ jaate hain vahi log kaḌe vaqt men kyon
ham jinhen apna batate hue thak jaate hain
Daste rahte hain ka.i log yahan sanp-mizaj
aur ham zaḳhm chhupate hue thak jaate hain
lauT aao na kisi roz ai jaane vaalo
ham gham-e-hijr chhupate hue thak jaate hain
un ke sinon men bhi hote hain talatum gham ke
vo jo auron ko hansate hue thak jaate hain
zindagi aur tira qarz chuka.en kab tak
ab to ham sher sunate hue thak jaate hain
Leave a Reply