yuun guzar raha hai din kitne imtihanon se
saaya saaya utri hai dhuup asmanon se
kyuun kahen kisi se ham kaun si hava thi vo
raushni chura kar jo le gai makanon se
aaj apni mitti se is tarah main bichhdi huun
jis tarah bichhadte hain log khandanon se
lag chuki hai honton par jin ke mohr-e-khamoshi
ham saval kya karte aise be-zabanon se
bas unhi ki tasviren ab vahan munaqqash hain
aaine utha laae jo nigar-khanon se
Leave a Reply