ab to munh se bol mujh ko dekh din bhar ho gaya
ai but-e-ḳhamosh kya sach-much ka patthar ho gaya
ab to chup ho baagh men nalon se mahshar ho gaya
ye bhi ai bulbul koi sayyad ka ghar ho gaya
iltimas-e-qatl par kahte ho fursat hi nahin
ab tumhen itna ghurur allahu-akbar ho gaya
mahfil-e-dushman men jo guzri vo mere dil se puchh
har ishara jumbish-e-abru ka ḳhanjar ho gaya
ashiyane ka bata.en kya pata ḳhana-ba-dosh
chaar tinke rakh liye jis shaḳh par ghar ho gaya
hirs to dekho falak bhi mujh pe karta hai sitam
koi puchhe to bhi kya un ke barabar ho gaya
soḳhta dil men na milta tiir ko ḳhuun ai ‘qamar’
ye bhi kuchh mehman ki qismat se mayassar ho gaya
Leave a Reply