honTon par hai baat kaḌi ta.aziren bhi
ḳhamoshi ka rang huiin taqriren bhi
ḳhauf yahi hai aane vaali naslon ko
ek ajuba hongi ye tahriren bhi
mausam ke sau ruup magar in ankhon men
ḳhvab vahi hain ḳhvabon ki ta.abiren bhi
a.inda ke saans hamare apne hain
TuuT chukin is va.ade ki zanjiren bhi
ek ajab hairat men gum-sum rahti hain
divaren divaron par tasviren bhi
paani ki ḳhamosh sada.en kaun sune
ḳhatm huiin jab miTTi ki tasiren bhi
Leave a Reply