Rakhshanda Naved
ghuTi ghuTi ḳhaak men dabi is sada se aage
hai aur shara-e-marg karb-o-bala se aage
mire masiha talash kar dhaḌkanon ke jugnu
yahan vahan zindagi paḌi hai fana se aage
nigal ga.i hanste-khelton ko palak jhapakte
sitamgari men zamin baḌhi intiha se aage
unhin ki sanson ko le uḌe andhiyon ke rele
jo uncha uḌne ki chaah men the hava se aage
sharik-e-gham sab hue hain lekin ye vaqt vo hai
ki jis men darkar aur kuchh hai dua se aage
main chhat tale piTti huun ‘raḳhshanda’ apne sar ko
ki ham-nafas nange sar khaḌe hain rida se aage
Leave a Reply