Irfan Siddiqi
pukarta hai magar dhyan men nahin aata
ajiib harf hai imkan men nahin aata
bas ek naam hai apna nishan jo yaad nahin
aur ek chehra jo pahchan men nahin aata
main gosha-gir hun sadiyon se apne hujre men
masaf-e-bai.at-o-paiman men nahin aata
mujhe bhi hukm nahin shahr se nikalne ka
mira harif bhi maidan men nahin aata
main is hujum men kyuun is qadar akela hun
ki jam.a ho ke bhi mizan men nahin aata
mire ḳhuda mujhe is aag se nikal ki tu
samajh men aata hai iqan men nahin aata
Leave a Reply