Tanveer Ahmad Alvi
mil bhi jaata jo kahin ab-e-baqa kya karte
zindagi ḳhud bhi thi jiine ki saza kya karte
sarhaden vo na sahi apni hadon se bahar
jo bhi mumkin tha kya us ke siva kya karte
ham sarabon men sada phuul khilate guzre
ye bhi tha abla-pa.i ka sala kiya karte
jis ko mauhum lakiron ka muraqqa.a kahiye
lauh-e-dil par tha yahi naqsh-e-vafa kya karte
ab vo shalon ka qafas ho ki lahu ki ḳhushbu
dil pe lahrati rahi barq-e-ada kya karte
mangne ko to yahan apne siva kuchh bhi na tha
lab pe aata bhi agar harf-e-dua kya karte
ham ko ḳhud arz-e-tamanna ka saliqa bhi na tha
vo bhi ‘tanvir’ bhala uzr-e-jafa kya karte
Leave a Reply