jab tumhare ishq men main ne jalain ungliyan
mere pagal-pan pe tum ne bhi uthain ungliyan
chahaton ke daere jab be-nishan hone lage
phir mire khun-e-tamanna men nahain ungliyan
raat phir aisa hua ki ped ke saae tale
yaad aae tum tumhari yaad aaiin ungliyan
chahaton ke silsile jab darmiyan badhne lage
us ne balon men mire apni ghumain ungliyan
zindagi meri bhi us dam jhumne gaane lagi
fart-e-ulfat se miri us ne dabain ungliyan
jab mili tahrik mujh ko qafiya-paimai ki
harf ki hurmat liye sajde ko aaiin ungliyan
sar-nigun kar ke jo pahunchi rauza-e-aqdas pe main
jab dua ko haath uthae kapkapain ungliyan
chashm-o-dil dekha kiye ki haath men ‘afroz’ ki
ungliyon se mil ke us ki jagmagain ungliyan
Leave a Reply