Hafeez Hoshiarpuri
raz-e-sar-basta mohabbat ke zaban tak pahunche
baat baḌh kar ye ḳhuda jaane kahan tak pahunche
kya tasarruf hai tire husn ka allah allah
jalve ankhon se utar kar dil-o-jan tak pahunche
tiri manzil pe pahunchna koi asan na tha
sarhad-e-aql se guzre to yahan tak pahunche
hairat-e-ishq miri husn ka a.ina hai
dekhne vaale kahan se hain kahan tak pahunche
khul gaya aaj nigahen hain nigahen apni
jalve hi jalve nazar aa.e jahan tak pahunche
vahi is gosha-e-daman ki haqiqat jaane
jo mire dida-e-ḳhun-naba-fishan tak pahunche
ibtida men jinhen ham nang-e-vafa samjhe the
hote hote vo gile husn-e-bayan tak pahunche
aah vo harf-e-tamanna ki na lab tak aa.e
haa.e vo baat ki ik ik ki zaban tak pahunche
kis ka dil hai ki sune qissa-e-furqat mera
kaun hai jo mire andoh-e-nihan tak pahunche
ḳhalish-angez tha kya kya tiri mizhgan ka ḳhayal
TuuT kar dil men ye nashtar rag-e-jan tak pahunche
na pata sang-e-nishan ka na ḳhabar rahbar ki
justuju men tire divane yahan tak pahunche
na ghubar-e-rah-e-manzil hai na avaz-e-jaras
kaun mujh rahrav-e-gum-karda-e-nishan tak pahunche
saaf tauhin hai ye dard-e-mohabbat ki ‘hafiz’
husn ka raaz ho aur meri zaban tak pahunche
Leave a Reply