Tauseef Tabassum
tum achchhe the tum ko rusva ham ne kiya
phir kahna, kya tum ne kaha, kya ham ne kiya
aansu saare palkon hi men jazb hue
dariya ko tasvir-e-dariya ham ne kiya
ai mere dil tanha dil chup chup rahna
pahle bhi to shor kiya, kya ham ne kiya
naqsh-garo! kab ham ne manzar badla hai
chandi baal aur chehra sona ham ne kiya
aansu ne dil ka har daagh miTa Daala
paani se phir naqsh huvaida ham ne kiya
ḳhaak jo sahra sahra uḌti phirti thi
sar men Dali, ek tamasha ham ne kiya
ba.ad apne ab kaun bhala yaan aa.ega
apne naam pe ḳhatm ye ḳhutba ham ne kiya
Leave a Reply