ḳhirad ki raah se divangi tak baat kyon pahunche
shu.ur-e-gham ki ashufta-sari tak baat kyon pahunche
vaqar-e-ishq ki gham ya ḳhushi tak baat kyon pahunche
hazaron aur bhi dil hain usi tak baat kyon pahunche
agar daman bache rahbar ki uljhan se to achchha hai
ḳharab-e-justuju ki gumrahi tak baat kyon pahunche
nigah-e-dil ke partav se karen sham-o-sahar raushan
mah-o-ḳhurshid ki tabindagi tak baat kyon pahunche
mohabbat ki kahani ho ki nafrat ki hikayat ho
kisi ki bhi sahi lekin kisi tak baat kyon pahunche
nikharna hai to nikhre apne hi a.ine men fitrat
kisi ruḳh se nigah-e-admi tak baat kyon pahunche
mohabbat ḳhud hi hal kar le mohabbat ke muammon ko
ulajhne ko ḳhudi-o-be-ḳhudi tak baat kyon pahunche
samo den haal ke dil men jo mustaqbil ki dhaḌkan ko
to baḌh kar is sadi se us sadi tak baat kyon pahunche
sukut-e-gul hi a.ina bana de raz-e-gulshan ko
‘shifa’ apne mazaq-e-sha.iri tak baat kyon pahunche
Leave a Reply