Meri Har KHushi KHushi Thi Teri Har KHushi Se Pahle

Poet

miri har ḳhushi ḳhushi thi tiri har ḳhushi se pahle

mujhe koi gham nahin tha gham-e-ashiqi se pahle

koi kashmakash nahin thi gham-e-dushmani se pahle

mujhe ḳhauf hi kahan tha tiri dosti se pahle

na bahar-e-mai-kada thi na surur-baḳhsh naghme

tire mai-kade men kya tha miri mai-kashi se pahle

main dua.en chahta huun main dua ka mustahiq huun

tumhen kaun janta tha miri dosti se pahle

hui sham-e-husn raushan to main ban gaya patanga

tiri bandagi thi suuni miri zindagi se pahle

kahin tirgi thi ‘maikash’ kahin tirgi ke Dere

kahin raushni nahin thi miri raushni se pahle