ḳhun-e-nahaq thi faqat duniya-e-ab-o-gil ki baat
ye hai mahshar kyuun yahan ho daman-e-qatil ki baat
aaj kyuun ashkon men hai aks-e-tabassum jalva-gar
aa ga.i kya apni had par gham ke mustaqbil ki baat
har nazar rangini-e-ruḳh tak pahunch kar rah ga.i
phuul ab kis se kahen gulshan men zaḳhm-e-dil ki baat
dekhte hi rah ga.e qanun-e-qudrat ahl-e-zabt
le uḌi ḳhakistar-e-parvana jab mahfil ki baat
naḳhuda ham aur tufan se karen fikr-e-farar
ham kabhi karte nahin sahil pe bhi sahil ki baat
ho na jaa.e phir shu.ur-e-karvan nazr-e-fareb
chheḌ di hai rahbar ne aaj phir manzil ki baat
koi apna hai na koi hamdam-o-dard-ashna
ai ḳhuda kis se kahe ‘ejaz’ apne dil ki baat
Leave a Reply