hamen nayaft lamhon se mafar hota na ghar luTta
ki pahli barf-bari men kahan zad-e-safar luTta
kabhi vo bar-sar-e-paikar rahta aap apne se
kabhi vo dusron se du-ba-du zer-o-zabar luTta
tumhen is baat ka ehsas to hota hazimat par
sitare TuuT kar girte agar ḳhvab-e-sahar luTta
ye divar-o-dar-o-mehrab-o-mimbar hech hain phir bhi
hama-alam ko luTna hai magar tu baam par luTta
tiri uncha.iyon ne qad ko chhoTa kar diya sab ke
tujhe luTna tha vus.at men agar be-bal-o-par luTta
koi avaz pichhe ki taraf muḌne ko kahti hai
mire baazu qalam hote mire qadmon pe sar luTta
tire dukh ki gavahi chand taare bhi nahin dete
ki din bhar yuun paḌa sota na aise raat bhar luTta
ghazal lutf-o-asar pa kar ba-tarz-e-‘mir’ raqsan hai
chalo barpa karen mahfil chalo dekhen sharar luTta
‘ḳhumar’ aise safar men aankh chhin jaati to achchha tha
kahin shaḳhon ka sauda aur kahin dekha shajar luTta
Leave a Reply