Poet
vo rang-o-bu hai ki ankhon ko sujhta bhi nahin
vo phuul dil men makin hai ki jo khila bhi nahin
ye teri yaad ki dil se panah mangti hai
ye dil ki jis se nikalne ka rasta bhi nahin
jo mujh ko DhunD raha tha mire makan se duur
vo mere dil men makin ho ke bolta bhi nahin
kabhi kabhi to havas sub.h-dam uchhalti hai
vo ashk jin men koi gauhar-e-vafa bhi nahin
ham apni khoj men aisi jagah nikal aa.e
vo mil gaya ki jo kahiye ki tha to tha bhi nahin
har aankh barf hui ja rahi hai hasrat se
qarib-o-dur koi sho.ala-e-hina bhi nahin
vo jis ke ruḳh pe zaban hain baḌi baḌi ankhen
koi qarib se guzre to dekhta bhi nahin
miri hi god men hai aur mujhi se puchhta hai
vo naam kya hai ki jo tujh ko bhulta bhi nahin
main tera dard samajh lunga kyunki tujh sa huun
na hans sake to miri tarah muskura bhi nahin
shab-e-firaq sahi us ki aankh to lag jaa.e
vo aah kijiye kaise ki jo rava bhi nahin
Leave a Reply