Dil Shahjahanpuri
kya kahiye dastan-e-tamanna badal ga.i
un ki badalte hi duniya badal ga.i
ye daur-e-inqilab hai ḳhud-noshiyon ka daur
har mai-kade men gardish-e-mina badal ga.i
har phuul har kali pe barasta hai ab lahu
rangini-e-bahar-e-chaman kya badal ga.i
nikhri hui bahar men chhale hain ḳhun-chakan
apne qadam se qismat-e-sahra badal ga.i
paiham Tapak paḌe jo ba-hasrat huzur-e-dost
in ansuon se sharah-e-tamanna badal ga.i
azadi-e-junun ka yahi kya ma.aal tha
zindan se dil-farebi-e-sahra badal ga.i
vo ḳhvab-e-zindagi tha jo ham dekhte rahe
ai ‘dil’ khuli jab aankh to duniya badal ga.i
Leave a Reply