Kaleja Munh Ko Aata Hai Karen Tum Se Bayan Kyunkar

kaleja munh ko aata hai karen tum se bayan kyunkar

na puchho ham-safiro ham se chhuTa ashiyan kyunkar

zara dekhen badal jaata hai daur-e-asman kyunkar

kisi ke haal par hota hai koi mehrban kyunkar

hamen to gham se itni bhi nahin fursat ki ye sochen

mohabbat men hua karta hai koi shadman kyunkar

kisi par umr bhar ki kis tarah mashq-e-sitam tum ne

zara socho to dil men aur loge imtihan kyunkar

chaman men ek muddat ham ne mashq-e-gul-fishani ki

qafas tak aate aate aa ga.i tarz-e-fughan kyunkar

jo halat dil ki hai vo rang-e-ruḳh uḌ uḌ ke kahta hai

chhupa.en ham use bhi surat-e-dard-e-nihan kyunkar

kaleje ki tarah jis ko jagah di ham ne siine men

vahi dil ban gaya hai aaj un ka ham-zaban kyunkar

kisi din aa ke ankhon se zara tum dekh to lete

kiya karta hai koi hijr men ah-o-fughan kyunkar