faza-e-mai-kada be-rang lag rahi hai mujhe
rag-e-gulab rag-e-sang lag rahi hai mujhe
ye chand din men qayamat guzar gai kaisi
ki aaj sulh tiri jang lag rahi hai mujhe
mire makan se do-gam par hai teri gali
ye aaj saikdon farsang lag rahi hai mujhe
nva-e-naghma bhi hain soz-o-saz se khali
fughan bhi kharij-az-ahang lag rahi hai mujhe
zarur phir koi uftad padne vaali hai
ki ye zamin bahut tang lag rahi hai mujhe
Leave a Reply