Saleem Betab
ji men aata hai ki ik roz ye manzar dekhen
samne tujh ko biTha.en tujhe shab-bhar dekhen
band hai shaam se hi shahr ka har darvaza
aa shab-e-hijr ki ab aur koi ghar dekhen
aise ham dekhte hain dil ke ujaḌne ka saman
jis tarah dasiyan jalta hua mandar dekhen
aaj bhi shahr men hai meri vafa ki shohrat
aa.en aur aa ke zara mere sitamgar dekhen
mere jangal men hi mangal ka saman hai paida
shahr ke log mire gaanv men aa kar dekhen
Leave a Reply