kya ḳhabar apne Thikane ki taraf lauT aa.e
ḳhud-ba-ḳhud tiir nishane ki taraf lauT aa.e
sang lauT aa.e pahaḌon ki taraf aḳhir-kar
aa.ine a.ina-ḳhane ki taraf lauT aa.e
jab khula un pe ki naqsha mire sanduq men hai
aur kuchh saanp ḳhazane ki taraf lauT aa.e
raat badmast rahe sabit-o-sayyar ke saath
sub.h hote hi zamane ki taraf lauT aa.e
gaara tayyar hai aur chaak bhi maujud hai ab
kuza-gar kuuza banane ki taraf lauT aa.e
hijr ko jhelna asan kahan tha ai dil
ham mohabbat men bahane ki taraf lauT aa.e
bhiik is shahr men milna koi asan nahin
ya.ani majbur kamane ki taraf lauT aa.e
aur phir dasht-e-tamanna men bhaTakte hue log
arzu-mand Thikane ki taraf lauT aa.e
apna kirdar nibhane ki tag-o-taz men ‘zeb’
ham kahani se fasane ki taraf lauT aa.e
Leave a Reply