chalo aaj ek aur koshish hogi
phir ek shaam duub jaegi sharab men
zindagi ke andhere sard tukde
jaam men ghul kar honthon ke havale honge
zaban pe thirakti tishnagi dhire dhire
halq tak phail jaegi
khamoshi ka libas pahne
kone men qaid tanhai riha hogi
aur nas nas men daud kar raqs karegi
mere lahu men bah rahe us be-qabu shakhs ko
sambhalne ki mashaqqat hogi
sulagti ruuh us ki yadon ki bhaap men
tap kar surkh laal ho jaegi
ankhon se garm bulbule tapakne lagenge
jam-dar-jam andaruni ubaal
pighalta jaega
jab ankhon ke paimane bilkul khali ho jaenge
tab us laal bistar par
meri ninden tumhare khvabon ko
aghosh men le kar so jaegi