dost mayus na ho
silsile bante bigadte hi rahe hain akasr
teri palkon pe ye ashkon ke sitare kaise
tujh ko gham hai tiri mahbub tujhe mil na saki
aur jo ziist tarashi thi tire khvabon ne
jab padi chot haqaeq ki to vo tuut gai
tujh ko maalum hai main ne bhi mohabbat ki thi
aur anjam-e-mohabbat bhi hai maalum tujhe
tujh se pahle bhi bujhe hain yahan lakhon hi charagh
teri nakami nai baat nahin dost mere
kis ne paai hai gham-e-zist ki talkhi se najat
char-o-na-char ye zahrab sabhi piite hain
jaan luta dene ke farsuda fasanon pe na ja
kaun marta hai mohabbat men sabhi jiite hain
vaqt har zakhm ko har gham ko mita deta hai
vaqt ke saath ye sadma bhi guzar jaega
aur ye baten jo dohrai hain main ne is vaqt
tu bhi ik roz inhi baton ko dohraega
dost mayus na ho!
silsile bante bigadte hi rahe hain akasr
Leave a Reply