Muzaffar Abdali
ret ke shanon pe shabnam ki nami raat ga.e
aur kuchh tez hui tishna-labi raat ga.e
baam o dar jaag uThe shauq ne ankhen kholin
dil ki dahliz pe dastak si hui raat ga.e
mere siine men kisi aag ka jalna din bhar
us ke honTon pe vo halki si hansi raat ga.e
ik isi ḳhvab ne kya kya na tamasha dekha
niind ke haath men jaadu ki chhaḌi raat ga.e
fat.h paa.i hai sarabon pe mire ashkon ne
gham ne bandhi hai ka.i baar nadi raat ga.e
Leave a Reply