Hatim Ali Mehr
zulf andher karne vaali hai
tum ne nagan bala ki paali hai
qalamen rukhsar-e-yar par dekho
surkh hai phuul sabz daali hai
ghair par lutf hai sitam ham par
un ki jo baat hai nirali hai
vaah kya munh se phuul jhadte hain
kitni pyari tumhari gaali hai
murgh-e-dil bhi hai saath chidiya ke
jaal angiya ki un ki jaali hai
shab-e-furqat ko dekh bakht-e-siyah
koi bhi raat itni kaali hai
kyuun qayamat ki chaal chalti ho
is men ashiq ki paemali hai
dahan-e-yar ka pata na laga
baat kahne ko ik bana li hai
naf-e-maashuq saaf moti ki
nannhi-munni si ik pyali hai
kyunkar un ko duun mehr-o-mah se misal
jin ko daava-e-be-misali hai
rang laai gilauriyan kah kar
laal honthon pe aur laali hai
dil tasavvur men mahv rahta hai
ashiq-e-shahid-e-khayali hai
kyuun hansae na mujh se rind ko bang
dukht-e-raz ki bahan hai saali hai
dam ghanimat hai us masiha ka
ab tabibon se shahr khali hai
khaak udaai hai un ke kuche ki
ham ne sar par zamin utha li hai
dil mira le ke arsh par hai dimagh
aur hi ab mizaj-e-ali hai
kyuun buton ki hamen mohabbat di
kya musibat khuda ne daali hai
vaan kabhi ghair se kabhi ham hain
roz mauqufi aur bahali hai
de ke ik bosa-e-lab-e-jan-bakhsh
tan-e-be-jan men jaan daali hai
kya bala gori gori rangat par
zulf kaali hai aankh kaali hai
haal men shairi ka hai ye dhang
apna jo sher hai vo haali hai
dekho mujh par bahut sitam na karo
paas ai jaan kotavali hai
ham se inkar vasl ka hai abas
hogi jo baat hone vaali hai
un ke kuche men khaak ho jaaen
ham ne ik raah ye nikali hai
yaar pahlu men hai na jam-e-sharab
ye bhi khali hai vo bhi khali hai
hai sitam ye anile-pan ka banao
kaan men ek ek baali hai
us ke mazhab ka eatibar hai kya
‘mehr’ ik rind-e-la-ubali hai
Leave a Reply