Mela Ram Wafa
kuchh na kuchh hoga miri mushkil ka hal furqat ki raat
tum na aaoge to aa.egi ajal furqat ki raat
aa gaya kya nazm-e-hasti men ḳhalal furqat ki raat
ruk gaya kyuun daur-e-gardun ka amal furqat ki raat
ho rahi hain shaam se sakin ghaḌi ki suiyan
paanv phailata hai kya ek ek pal furqat ki raat
sard sard aahon se yuun aansu mire jamte ga.e
ho gaya ta.amir ik moti-mahal furqat ki raat
kuchh nahin khulta ki aḳhir is qadar lambi hai kyuun
vasl ke din ka hai jab radd-e-amal furqat ki raat
zindagi bhar ye bala pichha na chhoḌegi mira
aaj ja.egi to phir aa.egi kal furqat ki raat
sub.h ka munh dekhna mere muqaddar men na tha
mera andesha na tha kuchh be-mahal furqat ki raat
dard men Duube hue hain shahr saare ai ‘vafa’
kis qayamat ki kahi tu ne ghazal furqat ki raat
Leave a Reply