Gosht Ki Sadkon Par

phuul baasi ho gae hain

lams ki shiddat se thak kar

haath jhute ho gae hain

is jagah kal nahr thi aur aaj dariya bah raha hai

budha manjhi kah raha hai

khvahishon ke ped par latke hue

sayon ko dimak kha rahi hai

vaqt ki naali men

suraj chand taare bah rahe hain

barf ke jangal se shole uth rahe hain

khvab ke jalte hue chite

meri ankhon men aa kar chhup gae hain

ghar ki divaron pe

tanhai ke bichchhu rengte hain

tishnagi ke saanp

khali paani ke matke men apna munh chhupae ro rahe hain

raat ke bahke hue hathi

ufuq ke band darvaze pe dastak de rahe hain

haath chhodo

haath men kanta chubha hai

tiin din se phans andar hai

nikalti hi nahin

naam kya hai aur kahan rahte ho tum

jaama masjid ke qarib

kahte hain masjid ke minare bhi the

shahr men ik zalzala aaya tha jis se gir gae

gosht ki sadkon pe

kaale khuun ke sayon ka suraj chal raha hai

lazzaton ki aag men tan jal raha hai

Leave a Comment