juda.i ruuh ko jab ishti.al deti hai
ḳhunuk hava bhi badan ko ubaal deti hai
agar ho vaqt ka ehsas zindagani men
har ek saans hamen ik saval deti hai
usi ke dam se to yadon ke zaḳhm taaza hain
yahi saba hai jo har ghar ka haal deti hai
faza men rang tiri ḳhushbuon ke phaila ke
dukhe dilon ko saba bhi malal deti hai
raqabaton ke sabab se jo dhund chha jaa.e
tiri nigah vo manzar khangal deti hai
kudal pahli chala kar rivayaton pe ‘nazar’
kiya vo kaam ki duniya misal deti hai
Leave a Reply