Bas Gai Hai Rag Rag Mein Baam-O-Dar Ki KHamoshi

Gautam Rajrishi

bas ga.i hai rag rag men bam-o-dar ki ḳhamoshi

chirti si jaati hai mujh ko ghar ki ḳhamoshi

sub.h ke ubharne se shaam ke utarne tak

kitni jan-leva hai dopahar ki ḳhamoshi

chal rahi thi jab mere ghar ke jalne ki taftish

dekhne ke qabil thi shahr bhar ki ḳhamoshi

kaaT li hain tum ne to Tahniyan sabhi lekin

sun sako jo kahti hai chup shajar ki ḳhamoshi

toḌ bhi do chuppi ko ruThne ko taj Daalo

ho ga.i hai parbat si baat bhar ki ḳhamoshi

paḌ ga.i hai aadat ab saath tere chalne ki

bin tire kaTe kaise ye safar ki ḳhamoshi