log kahte hain bahut zinda-o-pa.inda huun
kis ko malum hai ye sach ki tira kushta huun
zindagi naam tanaffus ka nahin hai janan
shikva be-ja hai ki bin tere bhi main zinda huun
maar hi deti mujhe teri ye furqat lekin
kab tiri yaad ne chhoḌa hai ki main tanha huun
hai baja teri juda.i men to mar jaana tha
main magar hijr men bhi vasl se vabasta huun
marne jiine ka sabab ḳhuub hai ma.alum mujhe
sard-mehri hai kisi ki jo main ik lasha huun
be-ruḳhi ka hai vo ik sang faqat sang hai vo
aur main us ke liye shisha faqat shisha huun
vo ki hai mere liye atish-e-dil ai ‘ḳhalid’
main magar us ke liye sirf dhuen jaisa huun
Leave a Reply