Khursheed Akbar
ghar-bar kahan kucha o bazar miri jaan
darvesh ko duniya nahin darkar miri jaan
ik shahr zamin-bos hai aamad pe tumhari
raste men bichhe hain dar-o-divar miri jaan
kyuun arsa-e-aflak siyah-posh hai bolo
kis tarah zamin ho ga.i gulnar miri jaan
kuchh phuul hain shaḳhon se abhi jhuul rahe hain
ruḳhsar pe rakkhe hue ruḳhsar miri jaan
rota huun to sailab se kaTti hain zaminen
hansta huun to Dhah jaate hain kohsar miri jaan
sunte hain falak-bos imarat hai tah-e-ab
kya shahr tha kya mauj ki raftar miri jaan
dil hai ki abhi dard ke narghe men ghira hai
chehra hai ki aalam men hai aḳhbar miri jaan
ta-umr na milne ki kasak saath rahegi
pahla to nahin aḳhiri didar miri jaan
Leave a Reply