Fauziya Rabab
dil men thahra dard nigoda kuza-gar
kaise mod pe tu ne chhoda kuza-gar
main bhi khud se ruthi ruthi rahti huun
jab se tu ne mukh hai moda kuza-gar
ab to bikhre bikhre hain ajza mere
joda tha to kyun-kar toda kuza-gar
meri hasti men bhi teri hasti hai
mera mujh men kuchh bhi na chhoda kuza-gar
main ne khud men teri yaad sajai hai
jab bhi tu ne tanha chhoda kuza-gar
rag rag men ab mahshar barpa rahta hai
dukh tha pahle bhi kab thoda kuza-gar
kis ne mujh se chehra mera chhina hai
kis ne mera khuun nichoda kuza-gar
Leave a Reply